MOONGLOW NEL TOMA 3

Arrancamos el festival el vienres 28 de xunu a les 20.00 h. nel Toma 3, na cai Marqués de Casa Valdés 27 de Xixón.  Tres de la presentación, tendremos l'actuación de Moonglow.

Formáu nel so orixe por Luis Navarro (guitarra española) y Manuel Molina (percusión) en 1998, entamaron faciendo versiones y participando en festivales de jazz. En 2004 xuntóse-yos el vocalista Jorge Alonso y al poco el saxofonista Juan Antonio Martínez. Ofreceránnos un conciertu acústicu en formatu reducíu.

MOONGLOW

Los Izquierdos y Los Testigos en The Class

Depués del conciertu de Moonglow nel Toma3, a les 21.30 h. diremos pa la sala de conciertos The Class, que ta na Avd. Torcuato Fdez-Miranda 2 baxu. Ellí vamos poder ver dos bandes de sobra conocíes n'Asturies, Los Izquierdos  y Los Testigos, grupu de versiones de los '80 formáu por veteranos de la escena del pop-rock asturianu.

Los Izquierdos

FIESTA N'ALCORDANZA 2013

El vienres 28 a les 00.30 h. tendremos la "Fiesta n'Alcordanza 2013" nel Muddy's, c/ Santa Elena 21 http://muddysradiobar.blogspot.com.es/

La fiesta tará amenizada pola música de los años 80, por cuenta de Boni Pérez, auténtica lleenda viva del pop asturianu. La esbilla musical tendrá tres estayes: Asturistán, Españistán y Guiristán.

Boni Pérez tupiendo'l tráficu.

Jazz nel Alambique con Rubio, Pizarro, García y Morales

La xornada del sábadu 29 va entamar a les 13:00 hores nel Café Alambique, local asitiáu nel númberu 52 de la Avd. de la Constitución. El Café Alambique ye un local onde podemos ver davezu a conciertos de jazz, asina, les más de les bandes asturianes d'esti xéneru pasaron pel so escenariu, y nesti N'Alcordanza vamos poder ver a Rubio, Pizarro, García y Morales, tres apellíos qu'escuenden al saxu de Javier Rubio, la guitarra de Carlos Pizarro,  el contrabaxu d'Horacio García y la bateria de Felix Morales, en resume, cuatro de les meyores músicos de jazz d'Asturies que se xunten a esta xornada de revindicación y alcordanza.

Morales, García, Pizarro y Rubio

L'enfretamientu del sieglu, El Tamar vs Toli Morilla en La Vida Alegre

El día avanza, y a les 14:30 hores vamos tener dos opciones, una ye la xuntanza de dos voces y dos guitarres que van vese les cares, y los micros, en La Vida Alegre, local nel centru de Xixón na cai Buen Suceso 8, y que suel programar a lo llargo del añu conciertos de distintos estilos, rescamplando prestoses sesiones vermú  dalgunos domingos. Ellí van tocar El Tamar, cenciellu nomatu tres del que s'escuende Pablo Tamargo, guitarrista que toca en varios grupos y que tamién tien carrera en solitariu. Del otru llau del escenariu, ensin saber mui con cuantos kilos, va tar Toli Morilla, voz y guitarra constantes na música asturiana dende va más de venti años y que puede facer dende lo más personal hasta versiones de Bob Dylan.

Toli Morilla

El Tamar

Tonada N'Alcordanza, Mariluz Cristóbal ya Ismael Tomás

La otra opción a les 14:30 va ser na Sidrería Canteli, na cai Almacenes nº 6, onde ente sidra y comida bono vamos poder ver a dos de les voces más reconocíes de la canción asturiana, Ismael Tomás y Mariluz Cristóbal Caunedo. Los dos nun s'alcuerden yá de cuantes vegaes xubiero al escenariu o cuantos discos grabaron, pero siempre dexaron preba de dos voces increibles y un amor pola música fecha n'Asturies que merecía que la tonada y ellos dos tuvieren nesti N'Alcordanza.

Mariluz Cristóbal Caunedo

Ismael Tomás

Folk, Cazurrín, Tuenda y Felpeyu nel Ca Beleño

Tres un descansu más bien pequeñu, la música vuelve a les 17:30 hores nel Ca Beleño de Xixón, na cai  Rodríguez San Pedro, 39. El folk tien siempre abellugu nesti sitiu, poro ellí vamos poder ver a Cazurrín, proyectu personal del que foi vigulineru y bouzouki de Felpeyu, Fernando Oyagüez, trés d'él, va ser el turnu de Felpeyu, que como podéis comprender, poca presentación necesiten esta mítica banda de folk onde tocaben Ígor y Carlos. P'acabar. Tuenda, el tríu que dio-y una vuelta al repertoriu oral de la música tradicional asturiana.

Tuenda

Felpeyu (con Ígor y Carlos)

Cazurrín (Fernando Oyagüez)

Más Folk, el Café Trsiquel con DRD y Seu

A les 19:00 hores del sábadu la cosa sigue con más folk, nuno de los locales con más años y solera de la escena musical en Xixón, el Café Trisquel, na cai Marqués de San Esteban nº 30. Munchos conciertos y músicos pasaron pela so barra y escenariu. El N'Alcordanza folk del añu pasáu fízose ellí, y na edición d'anguaño los grupos folk DRD y Seu son los escoyíos pa tocar ellí. DRD, son un tríu de folk que surdió d'una actuación nel ciclu Folk de Cámara de Xixón, que precisamente entamaba Ígor Medio y que güei lleva'l so nome. Dende aquella ya van varios discos y munches ganes de facer bon folk. Seu pela so parte ye un grupu creáu de recién, y qu'axunta a varios de los componentes del grupu Corquiéu, como ellos se definen "banda de folk contemporáneu formada por cinco músicos del oriente asturianu, curtíos n'estremaos estilos musicales, que s'entemecen nesti proyectu.".

DRD

Seu

Travelling Zoo y Luís Dadá nel Patio de La Favorita

Averándonos ya a la nueche, vamos dir pal Patio de la Favorita que ta na cai Ezcurdia nº4 (enfrente la playa) vamos ver una par de nome hestóricos de la escena musical xixonesa y asturiana. Per un llau The Travellling Zoo, que nun ye otro que Fran Elías  el que fuera cantante y guitarrista nos 80 del grupu asturiano Modas Clandestinasy que se llanzó agora con esti proyectu musical unipersonal col qu'acaba de sacar discu, "Homework". Compartiendo local va tar tamién Luís Dadá, que tamién pertenciera a una banda de mítica uviedina, Salón Dadá, y que coincide tamién col so compañeru en tar acabante de sacar discu entituláu "Nada".

Luís Dadá

The Travelling Zoo

Nel Café Dam tenemos a Lavandera y Medication/2

Vamos metiéndonos a la nueche, y a les 22:00 hores nel Café Dam (cai San Agustín, 14) va toca-yos el turnu a Lavandera y Medication/2. Estos últimos foron ún grupos encuadraos dientro del "Xixón Sound", pero que quedaron a piques de grabar el so primer discu daquella. D'un tiempu a esta parte volvieron a la carga y decidieron particpar nesti N'Alcordanza. Lavandera vienen de Pola Siero col so apueste de pop de corte indie.

Lavandera

Medication/2 (nos 90)

Pesllamos nel Buddha con Pauline en la Playa, Nacho Vegas y Radio Fox

El caberu conciertu facémoslu nel Buddha (Marqués de San Esteban 23), ellí dende les 23:30 hores trés nomes de pesu como Pauline en Playa, el grupu xixonés llideráu poles hermanes Álvarez que ta acabante d'espublizar discu "El mundo se va a acabar", Nacho Vegas nome de referencia na música independiente na actualidá y Radio Fox, pa pesllar unes versiones de Los Locos ye'l meyor plan.

Nacho Vegas

Pauline en la Playa

Radio Fox